“İdman həftəsi” çərçivəsində keçirilən müxtəlif əyləncəli və maraqlı tədbirlər böyük coşqu ilə davam edir. Martın 8-də ailə komandaları arasında 2 km məsafədə estafet qaçışı keçirilib. Dənizkənarı Milli Parkda baş tutan yarış iştirakçılar üçün maraqlı və rəngarəng anlarla yadda qalıb.
Yarışda ümumilikdə 13 ailə iştirak edib və hər biri ən sürətli komanda olmaq üçün mübarizə aparıb. Gərgin və həyəcanlı keçən mübarizənin sonunda Süleymanovlar ailəsi birinci olub. Əsədovlar ailəsi yarışı ikinci, Nəcəfovlar isə üçüncü pillədə başa vurublar.
Bu tədbirlərin keçirilməsində əsas məqsəd idmanın kütləviləşdirilməsi, sağlam həyat tərzinin təbliği və ailələrin birlikdə aktiv istirahətini təşviq etməkdir. Belə yarışlar ailə üzvlərini bir araya gətirərək onların həm fiziki aktivliyini artırır, həm də sosial bağlarını möhkəmləndirir.
